مبادرة "مصارحة ومصالحة " علي العاشرة مساءا مع منى الشاذلي
اليوم ...الخامس عشر من مارس لعام 2008 ستظهر مجموعة من مؤسسي مبادرة " مصارحة ومصالحة - معا أمام الله " علي البرنامج المعروف " العاشرة مساءا " مع الإعلامية " منى الشاذلي" وذلك في تمام الساعة العاشرة والنصف مساءا
سيقوم البرنامج باستضافة أربعة أشخاص ممثلين عن المبادرة وهم
رامي كرم
شريف عبد العزيز
ماريان ناجي
سامية اليماني
نرجو منكم مشاهدة البرنامج ومتابعته والدعاء لنا بالتوفيق أن نعبر عن أنفسنا في أكثر الأشكال صدقا وأمانة بإذن الله
ستكون أراءكم وتعليقاتكم ونقدكم مهما جدا في هذا الوقت
خاصة وأننا لم نطمح لمثل هذه التغطية الإعلامية المكثفة ولم نكن مستعدين لها
الملف الطائفي بشكل عام هو ملف حساس وملئ بالتراكمات والتعقيدات ، ومحاولة أي إنسان مهما صدقت نواياه وحسنت مقاصده وانضبطت وسائله للخوض في مسألة مثل هذه قد تكون سببا في جلب الكثير من الأعباء والمتاعب له خاصة وأنه ملف معقد علي كل المستويات
نأمل أن تكون مبادرتنا خطوة لرأب الصدع وإعلاء صوت الحكمة وحقن الدماء ورد الحقوق وتصفية النفوس والتمهيد لخلق ثقافة بناء مؤسسة تهدف أساسا إلي التحاور والتفاهم وتجاوز عقبات الشك والريبة
اللهم ارزقنا الحكمة
وامنحنا السكينة
واعطنا البيان وحسن توصيله
والإيمان وحسن تطبيقه
واجعلنا أداة في رد الحقوق
وكف الظلم
ورد المظالم
وحقن الدماء وحماية الأعراض والاموال و النسل
اللهم آمين
جزاكم الله خيرا
Labels: العاشرة مساءا، منى الشاذلي، مصارحة ومصالحة، معا أمام الله
posted by ibn_abdel_aziz at 7:03 PM
42طھط¹ظ„ظŠظ‚ط§طھ:
شاهدت الحلقة الان
كانت رائعة
احيي كل من شارك بهذه المبادرة
واعلن تأييدي الكامل لها
سوف انتظر ان يضعه احد فاعلي الخير على يوتوب
:)
عموما يا شريف حاولوا تحطوه على النت عشان نعرف نشوفه
ولا شك ان هذا الظهور الاعلامي خطوة كبيرة سوف توصل صوتكم لقطاع عريض جدا من الناس لم يكن من الممكن الوصول إليهم دون هذا البرنامج
وقد يكون بداية ايضا لاعلاميين اخرين ان يعرفوا عن المبادرة وبالتالي يعرضونها ايضاً في وسائطهم الاعلامية
والفضل لله بالطبع في كل ذلك وهو القادر على تيسير الإثمار حين تصدق النيات
ربنا يحفظك يا عمو أنا شايف سعادتك
خسيت جامد اهتم بنفسك شوية مش حينفع كدة
:)
تحياتي أيضا للأستاذ/الدكتور رامي
فاتنى مشاهدة البرنامج إمبارح.. فى إنتظار اليوتيوب
نسيت اشوفها :(...ياريت حد يحطها علنت
كنتم جمال فى كلامكم ومقنعين وواضحين وعبرتوا عن الفكره تمام اوى
ضايقنى ان منى الشاذلى اتعاملت مع الموضوع بشكل اعلامى بحت وضيق الوقت
المشكله فعلا إن الفقره كانت قصيره جدّا كى يتحدّث فيها أربعة ضيوف بالإضافه -طبعا- لمساحة منى الشاذلى فى الحوار
:(
ياللاّ إن شاء الله موفّقين ..
كنتم رائعين
انا فخور بأني اعرفكم بجد
This post has been removed by a blog administrator.
كلكم كنتم رائعين يا شباب بس انا بس عايز انتقدك في حاجة صغيرة لما منى الشاذلي سالتك تعرضتوا لاي ضغوط او عقبات او حاجة انت هربت من الاجابة مع اني كان نفسي تجاوبها لانها كانت مركزة اوي على ان الموضوع بتاعكم ده ممكن يتحول لقضية امن دولة كانها بتعمل شو اعلامي
مصطفي النجار اشكرك علي التاييد والتشجيع
ونتمني ان تكون هذه المبادرة فعالة وتظل صادقة كما بدأت ان شاء الله
ازيك يا شدو
ان شاء الله تكون بداية خير
يوم واللا حاجة والفيديو يتحط علي اليوتيوب ان شاء الله
حوصل تحياتك لرامي يا حمادة
الناس بتقول خاسس فعلا
اعمل ايه بس
منت عارف
المهم انا عاوز اسمع نقد بناء سواء بالموافقة او المعارضة علي كل او جزء مما قيل
انت عمرك ما كلمتني في الموضوع ده
منتظر الراي
عدي النهار
قريبا جد ان شاء الله
النونو
حنحطها ان شاء الله
انا موافق معاك يا محمد
هي فعلا ركزت علي حاجات وسابت حاجات
بس الحمد لله
ربنا ستر
:)
صخ يا زمان الوصل
حوار مع 4 اشخاص ده كان مخيف قوي
هاني جورج
ونحن فخورون بالعمل مع سيادتكم
:))
بص يا احمد
انا جاوبت علي السؤال من وجهة نظري
انا شخصيا محدش حذرني
وفي الحقيقة مش فارقة يعني
فيه ناس شككت في التجربة وقالت حتفشل
وقالت حتتحول للعب عيال
عشان كدة انا قلت الاجابة اللي انا كنت شايفها
بس اكيد فيها ناس مننا سمعوا تحذير من موضوع امن الدولة وبيتيهيالي ماريان قالت ان ده حصل معاها شخصيا
ربنا يبارك فيكوا ياشريف
متشكرين جدا يا نانسي
كله بفضل الله اولا
ثم باخلاص القائمين علي المبادرة
ثم بدعاء المحبين للخير والمريدين له لكل الناس علي حد سواء زيك كدة
جزاكم الله خيرا
يا ريت بقي النقد يبدأ يا جماعة
ما هي نقاط القوة والضعف بشكل عام وبصراحة
ما اكثر ما اعجبك
واكثر ما ضايقك
قم بتقييم العرض بشكل عام
او قيمه حسب الفقرة او كما تشاء
شكرا
يا ريت لو بجد تحطوها يوتيوب علشان انا معنديش القناة من اساسه
متشكرة
I have seen the program .. oh thx God there were some beautfuil minds here in Egypt ..oh welcome .Plz continue . we will support it
حفصة الفيديو اون لاين اهوه
علي جوجل
نتيجة لكبر الملف وطول وقته معرفناش نحطه علي يوتيوب
Firewall , thanks for calling us beautiful minds , we hope we are , we're only trying , we can only do so little , but if this is all what we can do , we'll do it inshallah
Thanks for your support
متشكرة يا شريف
بس هل يا ترى منى الشاذلي هبلة و لا بتستهبل؟؟
يعني اللي حصل في الاسكندرية لا يرقى لفتنة طائفية؟؟
امال كان ايه شد ودان؟؟
و بعدين اتكلمت كتير اوي و رغرغت اوي
و كمان في الاول بتقول هل حتنتهي بكذا و لا بكذا و لا حتنتهي بقضية امن دولة؟؟
يعني مش فاهمة هي متخلفة اوي انها تلبسنا تهمة على الهوا و تدي الداخلية سبب و مسمى ظريف اوي انه يتلكك و يخنق على المدونين
ربنا يهديها
بس تسلم اياديكم و تسلم عقولكم و تسلم السنتكم
تحياتي
بالراحة شوية اخت حفصة على منى
ثانياً الفقرة كانت قصيرة و مزدحمة بالضييوف و كان من الافضل ان تفرد لها نصف حلقة
ثالثاً تحية لهذه المبادرة
اخيراً لم تعجبنى بعض الاسئلة العقائدية البحتة
يا شريف أنا مليت الاستفتاء
وانت لو كنت بصيت على النتايج أتوقع حتطلع إجاباتي من بين كل الإجابات أكيد
فيه إجابات كثير أنا قلت ماليش دعوة النقطة دي ما تهمنيش وده عنصر مهم جدا في تقييم الموضوع إن فيه نقاط مش تهمني لأن لا ينبني عليها عمل بالنسبة لي
اللي خلاني أعبر عن احترامي للمبادرة وأصلا أنا أحترم الأستاذ رامي من قبل كدة من كلامك عنه ومن تتبعي لطريقته
في خلال كلام الأستاذة ماريان كان فيه نقاط جميلة هي ركزت عليها اللي هي المصارحة والوضوح ودي كانت واضحة جدا
في كلامها
وانا مارست النقطة دي كذا مرة مع مسيحيين وكانت نافعة في تحديد إطار جيد للعلاقة بيننا
زي ما ماريان مثلا قالت إن مش كل ملتحي هو شخص خطر مثلا ودي صورة سلبية موجود بالمسها في التعاملات اليومية
حاذكر مثال عليها تحت خالص
عجبني في كلامك انت ورامي نقطة هامة جدا وهي التركيز على الحقوق والواجبات وابتديت أقتنع بوضوح الرؤية عندكم لما لقيتكم بتتكلموا عن العقائد وإن المبادرة مش مقصود منها إن حد يلغي عقيدة حد في الآخر أو في ديانته مش فاكر الألفاظ بس وجود النقطة دي والتركيز عليها في حد ذاته نقطة إيجابية جدا
بالنسبة لبعض الناس ركزوا في التعليقات هنا وفي الفيس بوك على المذيعة وتركيزها إن هذه المبادرة ممكن تؤول إلى قضية أمن دولة تفسيري لها إن الإحصاء بشكل عام هو يمس أمن الدولة حتى إن إحصائية أعداد النصارى في مصر يعتبر أمن قومي ولا أحد لديه أرقام حقيقية في هذا الأمر
من وجهة نظرنا إن الإحصاء ودراسة الواقع هو أول خطوة نحو التخطيط السليم عشان كدة أنا كنت حريص إني أجاوب على الاستبيان بشكل دقيق ومعبر عن العقيدة والأحاسيس والمشاعر وكنت حريص إني أقول النقطة دي مش في حيز اهتمامي مثلا لأن لا ينبني عليها سلوك بالنسبة لي ودي نقطة ربما يكون انتم مش اهتميتوا بيها في الاستبيان
وانا استغربت لما لقيتكم مركزين عليها في التليفزيون وهي العقائد ومرجعيتها بدلا من تحليل ثقافة سائدة أنا عارف انك فاهمني لأننا اتكلمنا في كدة من فترة وانا كنت حريص في إجاباتي إني أرد على سلوك حقيقي صحيح مع كشفي عن الباطن أقصد باطني ذو المرجعية الدينية دي نقطة عايزة تاخد حقها جامد أوي
حفظكم الله
============
مثال
كنت في محل قطع غيار إلكترونيات كزبون وجاء مسيحي يطلب فلوبي درايف رد البائع ثمنه خمسين جنيه
سألته إنت عايزه ليه -أنا أصلا ده سلوك عندي النصيحة عمال على بطال
رد علي بجفاء شديد -وزق- عايزه وخلاص المهم فضلت وراه أوضح له إن الفلاش حاليا أفيد وفهمت إنه مش بيفهم في الكمبيوتر وإن بنته مدرسة وبتنسخ على فلوبي فضلت أشرح له السعات والأسعار والمقارنة لحد ما اقتنع خلال المناقشة لهجته اتغيرت 180 درجة
فشكرني وسلم علي ومشي
طبعا هو أخد وقت على بال ما تصور إني باتدخل لمصلحته أصلا
نفس الموقف حصل مع واحدة وهي داخلة محل العطار تشتري فحم والموجود هو فحم سريع الاشتعال واشترته وخلاص أنا فهمت إنها مش عارفة هو إيه الفرق بينه وبين الفحم العاي وتصورت إنها عايزاه عشان يعمل ريحة بس للأكل وده مش ينفع فيه سريع الاشتعال قعدت أنصحها وهي برضه في الأول قافشة وبترد ناشف لحد ما اقتنعت إني قصدي انصحها ورجعت الفحم ودليتها على محل فحم متخصص
طبعا انا باتكلم عن ناس ما يعرفونيش لكن اللي يعرفوني أو جيراني فعادي
مش عارف أنا باتكلم في الهدف ولا بعدت
على كل انا عايزك تجمد شوية ومش حاعلق ع البوست الجديد
عشان انا كنت كاتب قبل كدة خفيف خفيف
وربنا ع الظالم
:)
لم يسعدني الحظ بمشاهدة تلك الحلقة بكل أسف.. لكنني مقتنع بالمبادرة وواثق في أنكم استطعتم توصيلها بشكل أوضح للجمهور الذي هو أوسع بكثير من جمهور المدونات ، حتى في وجود منى الشاذلي!
ياريت تضعه على المدونة علشان نشوفه
ربنا يوفقكم جميعا
ياريت تضعه على المدونة علشان نشوفه
ربنا يوفقكم جميعا
I love the idea and may allah guide all of us to the best.
Ahmad Said from Nevada.
مبادرة "مصارحة ومصالحة" وفكرة ممتازة وقد أعجبت بالحلقة ولا شك أن المشاركين مجموعة من الشباب المتميز ولكن ليس بالضرورة أن تؤدى المصارحة إلى مصالحة بل تؤدى إلى نتائج عكسية من مزيد من الفرقة والتباعد ، لذلك أعتقد على مجموعة ال15 أن توسع دائرة مشاركة العقلاء والمفكرين من المجتمع المدنى للرد على استفسارات وملاحظات الطرفين بخبرة وحنكة وموضوعية
خالد
مني الشاذلي كانت بتحاول تبقي دبلوماسية وفي نفس الوقت مثيرة باستخدام كلمات مثل امن الدولة
ولازم تقول لاترقي لفتنة طائفية عشان الاغلبية مش مقتنعة بده اصلا
ربنا يستر
ويكرمك ان شاء الله
:)
شكرا يا محمد علي الدعم
يا ريت تقول الاسئلة العقائدية ايه اللي كانت مش مناسبة
عشان الفيدباك يهمنا جدا
مع العلم ان الاسئلة التي كانت تبدو عقائدية هي في الحقيقة مش المقصود بيها ده
بعضها بيبقي مقصود بيها تاثير مفهوم عقائدي معين علي الحياة الاجتماعية
مثلا
الطبيعي ان يري المسلم ان المسيحي او غير المسلم كافر بالاسلام وان دينه هو الدين الحق
والعكس صحيح
السؤال بقي
ده تاثيره ايه علي المعاملة ؟
فيه ناس بتحس باستعلاء انساني نتيجة للاستعلاء الديني
ماهو اصله فيه استعلاء ديني طبعا
لما اقول ان الدين عند الله الاسلام يبقي استعلاء عقائدي
بس معناه ايه؟
يترتب عليه اني امن علي الناس بحقوقهم وابلطج عليهم ؟
ولما اقول حاجة بمعني انه لا خلاص الا من خلال المسيح مخلصنا وفداؤنا
معناه برضه استعلائي من حيث ان الخلاص يكون من جهة واحدة وفقط
بس ده معناه ايه برضةوتاثيره علي الحقوق؟
فاحنا بنحاول نفهم معني انك تري الاخر كافر بعقيدتك
بيخيليك تقرف منه وتحس انك من حقك تدوس عليه؟
واللا ايه؟
فهي مش اسئلة امتحان عقيدة مين صج
لأ
دي اسئلة استشعار بنحاول نفهم منها مين بيحس باحتقار للاخر لمجرد انه شايف الاخر هالك يوم القيامة؟
وعلي كل خال
ممكن تقوللنا الاسئلة اللي ليك عليها تحفظات عشان نراجعها برضك
ربنا يكرمك
عصفور
تعليقك رائع
وامثلتك ممتازة
وتقديرك لماريان ورامي شافوه ان شاء الله وياريت يشاركوك في التعليق
ربنا يكرمك
اني احبك في الله
حتي في وجود مني الشاذلي يا قلم
:)
هي حاولت تجرنا في مساحة حمرا
واحنا خضرناها
واللا ايه رايك؟
تم وضعه يا اسرة بهائية
:)
اشكرك علي المرور
Ahmed Said beta3na :) ?
Jazakom allah khyran
anynomous
طبعا التصارح ممكن يؤدي وقتيا للكراهية
بس علي المدي البعيد هو بيعمل " تخلية" يعني بيفرغ الصدورمن القيح
اكيد لازم نشرك المزيد من العقلاء في الفكرة
ودي نيتنا ان شاء الله
شكرا علي تعليقك
:)
والله جميل جدا
اعتقد ان اغلب افكارنا عن الآخرين ناتجة عن التقليد والتعصب الاعمى بدون تفكير ، لذلك اول طريق لمعرفة الآخر هو تحري وبحث حقيقته مباشرة منه هو شخصيا
لذلك اقدم احترامي العميق لكل من شارك بهذه المبادرة واحييه على شجاعته فى مواجه التقليد والاوهام الراسخة ومحاولته تغييرها واستعداده لسماع وجه النظر الآخرى
النقطة الاخرى: معا اما م الله شعار جميل لاننا جميعا قد نكون مختلفين فى عقائدنا وطرق عبادتنا لله ولكننا جميعا متحدين فى حب الله سبحانه وتعالى وفى الاخلاقيات الحميدة والفضائل
كما ذكرتم بالبرنامج
حقيقي ربنا يحفظكم
Post a Comment
<< Home