لن أقاطع المنتجات الدانمركية
ليه ؟ غلاسة مثلا ؟ شريك مخالف ؟ يقولوا يمين أقول شمال ؟ مش عاجبني العجب ولا الصيام في رجب ؟ انت يبني دايما عامللنا فيها صاحب رؤيا موزمبيقية ذات محور لولبي وعايشلنا في دور الرجل ذي البعد المكعب والقعر المتشعب ؟؟ ايه حكايتك يعني ؟؟؟
نبدأ بالصلاة علي خير البشر نبي الله محمد عليه الصلاة والسلام....بصوا يا سادة يا مسلمين ويا مسلمات....اننا نتحمأ عشان حد سب النبي او سخر منه ده شئ طبيعي منطقي ويمكن لو متضايقتش يبقي عندك " تلبك معوي " ...بس فيه حاجة انتم مش فاهمينها...مش كل ما شخص ما في دولة ما في مكان ما وزمان ما يعمل شئ ما مش عاجبنا نروح مقاطعين الدولة كلها وأمها وابوها واللي جابوها
يا حلوين يا أمامير..فيه حاجة في اوروبا اسمها ديموقراطية...ومش متفصلة...يعني اللي عاوز يقول محمد ارهابي يقول ..عيسي قلع ملط يقول ....حق يقول..باطل يقول....عشان كدة حضراتكم كلكم لو الحكومة المصرية قالت اللي عاوز يهاجر من مصر النهاردة ياريت يتفضل..حتلاقوا ملايين المصريين واقفين في طابور طوله كما بين الاسكندرية والقاهرة بيقدموا طلبات هجرة علي كل دول اوروبا وامريكا الشمالية ..بما فيهم الدانمرك
فياريت اللي ف نيته يقاطع الدانمرك..ما يحطش رجله هناك اصلا...لحسن يتنجس ..ما هي اصلها بلاد كفار ولاد كلب ....عشان النفاق وحش جدا..وهو كبيرة من الكبائر
بتريق لا سمح الله ؟ لا والله ..اصلي مفقوع
دول اوروبا فيها حرية اكثر من اللي عندنا تلتميت الف مرة
مش حننقي الحرية دي حسب مزاجنا
زي ما ساعات بتتظلم , ساعات بتاخد حقك ..وزي مبتتشم ..بتشتم...وزي ما حد بيهاجم دينك ..ليك الحق تهاجمه هو كمان
عشان كدة كلنا علي بعضنا بنهج من بلاد "نا " الي بلاد " الاعاجم " لاسباب واضحة جدا
في بلاد " الاعاجم " ..حرق العلم مثلا اكثر جرما من شتيمة اي دين او رمزه
ورغم كدة مسموح بيه قانونا باعتباره حرية راي
حتي لو كان الراي غبي
اللي عاوز يدافع عن النبي ..ميدعوش لمقاطعة دولة مش مسؤولة عن كل مواطن او مؤسسة فيها
يقارع الحجة بالحجة
يعلن غضبه من المؤسسة اللي قامت بكدة مش يدعو لمقاطعة دولة كاملة
يعني احنا بلادنا اللي كويسة ومبتتشتمش الباقيين سواء في الدين او في القومية او في العرق؟
مش بنكت علي الخلايجة وعلي الافارقة وعلي امم الارض؟
وبنتريق علي دين ده وعقيدة ده ؟
في الشوارع وفي الجرائد وفي الاعلام ؟
يعني عاوزين دول العالم تقاطعنا ؟
يبقي ليهم حق
يا ريت تقولولي ايه البار كود بتاع المنتجات الدانمركية عشان اشتري منها اكثر
عارفين ليه ؟
عشان دي دولة محترمة سامحة للكل بحرية الراي
مش البلطجة
اللي مش عاجبك ..قارعه بالحجة مش بالدراع
عشان دي علامة ضعف وفشل ذريع
ممكن تقاطعوا منتجات السودان عشان مذابح دارفور ؟
واللا ايه رايكوا نقاطع منتجات السعودية عشان فلوس الامراء اللي صارفينها في مواخير اوروبا ونوادي شارع الهرم؟
طب منقاطع منتجات قطر عشان مركز قيادة العمليات العسكرية للغزو الامريكي للعراق كان علي بعد اميال معدودة من مقر قناة الجزيرة ؟
واللا ايه يا مسلمين ويا مسلمات؟
ممكن تقاطع منتجات الصين الرخيصة عشان حتة الموبيل الشيك اللي معاك ده معمول بعرق بنت عندها ثمان سنين او عشر سنين بتشتغل زي العبد 16 ساعة في اليوم بدون حتي فرصة تروح الحمام تتبول او تقضي حاجتها ..عشان حضرتك تستخدم الموبيل تبعت بيه رسايل تكست ماسج لنصرة النبي ؟
اقول ايه تاني ؟
محدش عاجبه اللي بقوله ؟
طز
مش من سمتي اني ارضي حد علي كل حال
اللي عاوز ينصر النبي....يرمي ام الموبيل الصيني من ايده او يقلع الهدمة الصيني اللي لابسها او يقاطع منتج سوداني لو حب ....واللا ايه النظام ؟؟؟
طب عاوزين حملة مقاطعة بجد؟ ما فيش مشاكل ...تعالوا نقاطع - لو غاويين يعني - الحكومات الجائرة في العالم
و أقرأ إن شئت
رسالة إلي رسول الله
إلي حبيبي الذي كلما ذكر اسمه بالخير سما وكلما ذكر اسمه بالشر علا
إلي من لا يؤذيه إنكار المنكرين ولا شتم الشاتمين ولا سخرية الساخرين
إلي من لا يضر ولا ينفع ولا يذل ولايرفع...عبد بن عبد بن عبد..نبي كريم ..ورسول رحيم...وانسان عظيم
إليك يا حبيبي أرسل هذه الكلمات وكأنني بين يديك واضعا رأسي في ذلة وخضوع حبا وتقديرا
يا رسول الله
ألم تأتنا بالعدل تفك أسر المأسور وتطلق سراح العبيد وتحارب جبروت البشر ؟
ألم يحاربك القاصي والداني إلا لأنك قلت لهم : اليوم ينتهي بطشكم ويرفع الله ظلمكم ويحرر الله بي عباده الذين ذللتم ؟
ألم تكن مع المساكين ترتدي ثياب الفقراء وتأكل طعام الجياع وتمشي بك المراة تأخذ بيدك تسألك حاجتها لا تردها أبدا ؟
ألم تكن تنام علي خشونة الأرض ؟ تنكمش وسط دارك لضيقه وقلة مساحته ؟
ألم تنهي الناس عن قتل الأطفال خشية فقر أو عار؟
ألم تنهي عن ميراث النساء كبضاعة مشتراة ؟
ألم تساوي بين الأسود والأبيض والعربي والأعجمي ؟
ألم تأمر بالعدل وتنهي عن الظلم والجور يا من قلت لو ان فاطمة بنت محمد سرقت لقطعت يدها ؟
ألم تقل اتقوا الظلم فإن الظلم ظلمات يوم القيامة؟
ألم تتلوا علينا قول الله : ولا يجرمنكم شنئان قوم علي ألا تعدلوا , اعدلوا هو أقرب للتقوي؟
ألم تغفر لمن شتمك ؟ وتعفو عمن سبك ؟
يا رسول الله
المسلمون يتصايحون كلما سبك ساب وشتمك شاتم ويسخرون المال والعتاد للدفاع عن اسمك الذي لم تطلب منا ان ندافع عنه
ولا يقولون كلمة حق واحدة امام الجائرين
ولا يرفعون راسا امام الظالمين
ولا ينصرون المستضعفين
ولا يرحمون الارامل
ولا يطعمون الفقراء
ولا يعلمون الناس الحرية التي علمتها لنا
ولا يبالون الا بالهوية والانتماء ولا يهتمون برفع الظلم عن الضعفاء وهم بالملايين يا رسول الله
ينافقون وهم يعلمون
يلعنون القاصي والداني ثم ينامون في بلادهم يأكلون ويشربون
يحسبون كل صيحة عليهم وهم اكثر الناس شرا وبأسا فيما بينهم
يشتكون من الشرق والغرب وهم أشد ظلما من اهل الشرق واهل الغرب
يتصايحون ان هلموا انصروا نبيكم
فان دعوا الي كلمة حق تنصر مظلوما وتردع ظالما وقفوا كالاشباح لا يتحركون
لم يعيشوا ولن يموتوا لما عشت ومت عليه
حكمهم جبارون قرون طويلة ..يسمونهم خلفاء....وهم شر الناس
يعتزون بهم لا أدري بما يعتزون؟
ان ظلمهم اجنبي هاجوا وماجوا..وان نكحهم الذين منهم سكتوا وذلوا وقالوا هذا شرع الله ؟
يا نبي الله
يا من تبكي لدمع المظلوم...اتحب ان انصر اسمك بهاتف جوال ادعو الناس به للذود عنك وهو مصنوع بعرق من بكيت لظلمهم وجئت لتحريرهم؟
لو انهم بذلوا معشار ما يبذلون الان من اجل نشر العدالة في الارض
لما هان اسمك علي احد
خذلوك بخذلان الذي جئت من اجله
فارضوا ضمائرهم بالدفاع عن اسمك
ودفنوك يا حبيب الله في حفر النسيان
نصبوا رايات عليها اسمك
وبكوا علي سيرتك
ثم ظلموا وظلموا وظلموا وظلموا وظلموا
يا رسول الله
يا امام العدل
سامحني ان ظن الناس اني نسيتك اذ لم اذكر اسمك في كل صلاة كما يذكرون ولم أمضي كل عريضة يمضون ولم اغني كل نشيد مديح لك ينشدون
فقد انشغلت بالذي جئت به.... عن اسمك .........يا حبيبي...واني لمن الظالمين
posted by ibn_abdel_aziz at 9:30 AM
89طھط¹ظ„ظŠظ‚ط§طھ
