لسة طازة ...من جوة مسجد في أمريكا...صلاة الجمعة
انتهت الصلاة ووقف الامام يدعو لمقاطعة " الأعداء" الذين تجرأوا علي رسول الله صلي الله عليه وسلم
الامام مصري ازهري من جماعة الاخوان المسلمين اعرفه منذ زمن ويعرفني ...اخذته علي جنب لاحاوره في موضوع المقاطعة واردت ان اوضح رأيي المخالف للاغلبية
الحوار
شريف : السلام عليكم..انا كنت بس عاوز اقول ان لي رأي مخالف في موضوع المقاطعة دي وحاسس انه ظلم بصراحة اننا نعاقب امة باكملها عشان مجلة واحدة
الشيخ : مش بس المجلة دي الحكومة اللي رفضت الاعتذار
شريف : منت عارف انهم رفضوا الاعتذار عن حرية الراي مش عن سب النبي وان الحكومة مش مسئولة تقول لرعاياها يقولوا وميقولوش ايه
الشيخ : مش مهم ..المهم انهم تجراوا علينا ولازم يعرفوا اننا مش حنسكتلهم لو سبناهم المرة دي غيرهم حيتجرأ
شريف : هما مين اللي سبناهم ؟ انت بتتكلم عن مين بالضبط ؟
الشيخ :الغربيين
شريف : وهما الغربيين كلهم ..ال 400 مليون بتوع امريكا الشمالية و300 مليون بتوع اورويا
كلهم سبوا النبي ؟
الشيخ : مش لازم..بس احنا عارفين هما نفسهم ف ايه ولو ف ايديهم كانوا عملوا كدة
شريف : مكنتش اعرف اننا بنعرف الغيب بصراحة وبنشوف الناس ونواياها..وياتري...حضرتك ايه اللي جايبك امريكا الدولة الغربية ؟
الشيخ : دي حاجة ودي حاجة
شريف : منت بتستخدم قوانين البلد دي في كل حاجة ولما بتتظلم بتاخد حقك
الشيخ : كدة احنا بنجادل والجدال لا خير فيه
شريف : هو كل ميبقي فيه حجة حد يقوللي جدال ؟ يا اخي الكريم انا بتكلم معاك اهو ..حجة بحجة..لحد ما حد يقنع التاني
الشيخ : ولو محدش اقتنع بالتاتي
شريف : جميل جدا ..مش لازم..بس ممكن اخد الميكروفون واقول للناس رايي ونسيب الناس تاخد موقف حسب رؤيتها ..مش مهم محدش يقتنع بللي بقوله..المهم انه ياخدو الفرصة يسمعوه وهما يقولوا
الشيخ : حتعمل بلبلة يا شريف
شريف : لاحول ولا قوة الا بالله ..هو عشان رايي مخالف ليك يبقي بلبلة .؟؟؟
الشيخ : عاوزني اعمل ايه يعني...بلاش انا ...الشيخ قرضاوي لسة قايل فتوي في موضوع المقاطعة دي ؟ حتقول لا للقرضاوي؟
شريف : انت عارف انا بحترم القرضاوي أد ايه ...بس مش بيغلط ساعات ؟ مش انت بتقعد تقول ساعات اخطاء ليه ؟ اشمعني يعني ما يغلطش دلوقتي ؟؟؟
الشيخ : كدة احنا بنجادل ...والجدال لا خير فيه
شريف : يا اخي الفاضل لما اقول ان رايي في القضية دي مخالف لرأي الاغلبية والسبب ان اكثر الناس معندهمش فرصة يسمعوا لاي راي اخر عشان المساجد كلها ماسكها ناس واحدة..لما اطالب بحقي في اني اقول رايي للناس ابقي بجادل؟
امال ليه عاوز تقول رايك للناس في المجتمع الامريكي عشان تغير وجهة نظرهم عن الاسلام وبتقول الاعلام ماسكه ناس بتكره الاسلام ومانعين غيرهم من انهم يقولوا رايهم
منت بتمنعني اهوه والحجة اني حعمل فتنة وان ده جدل والجدل حرام؟
يعني انت عاوز ديمقراطية البلد تخدمك انت بس ؟
الشيخ : ده جامع مش مجلس شعب
شريف : جميل جدا ..يبقي متتكلمش في قضايا سياسة هنا خالص وانا مش حفتح بقي
الشيخ : دي مش سياسة دي دين
شريف : هو انت لما تقاطع مش ده قرار سياسي واقتصادي وبياثر علي سياسات دول واقتصادها ..هو نقول تور يقولوا احلبوه ؟؟؟
الشيخ : بص صاحبك جاي اهوه..خليه هو اللي يقوللك ...انا مش عاوز اتناقش
ثم انسحب
سلام ...سلام
ثم جاء " صاحبي " ليعقلني
فقلت له
انا عاوز فرصة اقول حتي رايي
صاحبي : ربنا يهديك يا شريف ...انت يبني مبتتهدش ابدا؟؟؟؟
posted by ibn_abdel_aziz at 10:11 PM
15طھط¹ظ„ظŠظ‚ط§طھ:
طلعت أوت منك دى يا شريف أنا لسة جاى بردة من صلاة الجمعة والامام جوبان كان هادى جدا و دعا للتعرف على النبى و نشر المعرفة بيه و استغلال الحدث دعويا و مر على المقاطعة كده طيارى انا محتاج منك تنشر لنا نص الخطبة عشان برده نشوف هو كان بيقول ايه ونحكم
الأئمة بيصعبوا علي أحيانا.
هم أشخاص عاديين، ممكن يكون تعليمهم كويس أو لا، أذكياء أو لا، سياسيين أو لا، قارئين أو لا؛ لكن دي شغلتهم و دا دور لازم يلعبوه لأنه متوقع منهم. يعني طلع على المنبر و لازم يعمل أي حاجة و خلاص و هو و حظه.
علشان كده أنا لا أقدر أسمع خطبة و لا أصلي وراء إمام لأنه مجرد موظف و معندوش حاجة تفيدني، يعني لو فكرت فيه كقائد أوركسترا لشعيرة الصلاة يكون أحسن.
و زي ما أنت شايف النقاش معاه عقيم. و علشان كده باستغرب جدا اللي عندما تناقشه يقولك "أصل أنا سألت فيها" و يكون قصده على إمام الزاوية اللي تحت بيتهم أو من شابهه. و هو طبعا رايح من الأول و في دماغه أنه يسمع رد معين و هيدور عليه لغاية ما يلاقيه.
الدور التاريخي للإمام كشخصية كاريزمية و خطيب و قائد روحي (زي ما في المفهوم الشيعي أكثر كمان) لم تعد موجودة إلا فيما ندر و غالبا يكون السبب الحقيقي وراء هذه النوادر هو تدني مستوى المأمومين و ليس تفوق الإمام و دا هيخليني أسترسل في شوية أفكار تانية مش وقتها.
أعتذر إذا كان في الكلام ما قد يضايقك يا شريف و أدينا بنفضفض لحد ما الأتوبيس يوصل :)
طلعت أوت ؟
ليه هو انت كنت بتصلي في نفس الجامع؟
حضرتك في ولاية ايه ؟
ومش لازم كل الأئمة زي بعض
مش فاهم يعني ايه طلعت اوت ؟؟؟؟
اصلا الامام متكلمش عن الموضوع تقريبا في الخطبة
اتكلم بعدها
والاخ الانوميس يبقي مين ؟
ربنا يهديك يا شريف ...انت يبني مبتتهدش ابدا
مبحبش اللعب ده
يا استاذ انونميس يا اما تتكلم زي البشر ..يتمشي
سالتك كذا سؤال
جاوب
what can isay....a traditional conversation with the new generation of "imam(s)" and "da3ya"....i wonder where will they drive muslim people to...!!!
بص صاحبك جاي اهوه..خليه هو اللي يقوللك ...انا مش عاوز اتناقش
يا سلااااااام ... بيعجبني اوي البلوج بتاعك ... بس بدل ماتسميه العدالة للجميع يا ريت تسمية حكايات بن عبد العزيز صاحب الرؤية الثاقبة و الاعمال الخيرية و نصير المظلومين و مفحم المحاورين
شوية بشر من اصحاب التريقة
ولا مضمون ولا يحزنون
حتقعدوا تغنوا من الخرابات اللي قاعدين فيها لحد امتي ؟
جميل جدا ..يبقي متتكلمش في قضايا سياسة هنا خالص وانا مش حفتح بقي
استخبي في كهف الانانوميس بتاعك
واستغل حرية الراي اللي انا سايبها عشان تعيش في دور التفاهة اللي داخل بيه كل شوية
طب ما دام انت حجتك قوية
متقوللنا اسمك وعنوانك والمكان اللي صليت فيه وبتشتغل مع مين وتاريخك ايه
؟.
سلام
روح نام
وجهز نفسك لمعركة بكرة
شوف حتروح تنفس غضبك في مين
أنا معاك أن فية حالة من الغباوة نشفان الدماغ خاصة عند مشايخنا وللأسف من النادر أنك تلاقي واحد متفتح للمناقشة وجاهز يرد ويواجة الحجة بالحجة. في نفس الوقت عايز أوضح رأيي الشخصي في المقاطعة.
أولا المقاطعة دية في البداية كانت إيجابية لأنها عبرت بشكل كبير عن الحد المسموح بة في مناقشة أو حتى مهاجمة الدين عند المسلمين. الناس دية و أنت أدرى أكتر مني معندهومش مشاكل أي رسام، فنان أو كاتب يسب أو يسئ للمسيح نفسة وفي امريكا الموضوع دة منتشر. لكن مش معنى أن هما واخدين على كدة يقوموا مطبقين القاعدة علينا بكل بساطة لأن ثقافتنا ماتسمحش بمهاجمة لا المسيح علية السلام ولا سيدنا محمد بالأسلوب دة.
عشان ماطولش عليك المقاطعة وضحت للناس دي إلى حد ما الخط الأحمر اللي لازم يقفوا عندة, وأن كان في حالة عند دلوقتي لكن على المدى البعيد اللي بيحصل حيكون لية صداة. خاصة أن الرسوم والأساءة تنم عن جهل كامل بتعاليم الدين.
اللي يحرق دمي بقا أن شيخ الجامع اللي أنت بتحكي علية بيقولكم قاطعوا الغربيين وأنتوا في امريكا... يعني إية مش فاهم... تبعتوا تشتروا حاجتكم من كوالالمبور مثلا؟؟؟
اللي أنا أعرفة أن كلام العقل يقول أنة يدعوكم أنكم تكونوا مثال جيد للأسلام ويحثكم علي نشر الدعوة بين الناس عشان تغيروا الأسلوب اللي الناس دية بتشوف الأسلام بية. عشان أنا شايف أنهم بيحكموا على ألسلام من تصرفات المسلمين مش من تعاليمة.
ملحوظة أخيرة: الدعوة هي تنوير الناس بحقيقة الدين ومش ضروري هدايتهم... إنك لا تهدي من أحببت ولكن الله يهدي من يشاء.
حاجة تبكى ، هى الناس مستغنيه عن عقولها كده ليه، مستسلمة و خانعة كده ليه، خسارة فيهم العقل. فاكرين النكتة : العقل العربى طلع الاغلى فى بورصة العقول ، علشان على الزيرو.
****
كلامك حزنى و بكانى و فكرنى بالمصيبة السودة اللى أحنا فيها ، الاخوان و ما شابههم حيركبوا قطار الديقراطية : one way
و لما يوصلوا للسلطة ، رأى أيه و فكر ايه ، هو ينفع حد ينافس كلام الله و شرع الله
الاخوان و الاسلاميين بيجهروا ان الديقرطية و الكلام الفارغ دا كله لمرحلة التمكين و بعدين....
لا يوجد بعدين
Post a Comment
<< Home